საქართველოს მთავრობის 2022 წლის 2 მარტის #101 დადგენილებით ფართოვდება იმ ორგანიზაციების ჩამონათვალი, ვინც ვალდებულია 2024 წლის 1 იანვრიდან უზრუნველყოს შენობაში ვიდეო სამეთვალყურეო სისტემის მონტაჟი.
აღნიშნული ვალდებულება ეხება ყველა პირს, თუ:
შემოსავალი ნებისმიერი წინა უწყვეტი 12 კალენდარული თვის განმავლობაში აღემატება 500 000 (ხუთასი ათასი) ლარს და მიეკუთვნება შემდეგ ეკონომიკურ საქმიანობის სახეებს:
- საბითუმო და საცალო ვაჭრობა;
- განთავსების საშუალებებით უზრუნველყოფა (მათ შორის, სასტუმროებით და მოტელებით უზრუნველყოფა);
- საკვებით და სასმელებით მომსახურება (მათ შორის, რესტორნები, ბარები და ა.შ.).
შემდეგ ობიექტებს მიუხედავად შემოსავლისა:
- სტაციონარული სამედიცინო დაწესებულება;
- სიგარაბარი;
- ბაზარი/ბაზრობა;
- სავაჭრო ცენტრი;
- სამორინე, აზარტული კლუბი, სათამაშო აპარატების სალონი, ტოტალიზატორი, ლოტო და ბინგო;
- ავტოგასამართი, აირგასამართი ან აირსავსები სადგურები;
- აფთიაქი;
- მიკროსაფინანსო ორგანიზაცია;
- ვალუტის გადამცვლელი პუნქტი;
- სესხის გამცემი სუბიექტი;
- ზოგადსაგანმანათლებლო დაწესებულება;
- უმაღლესი და პროფესიული საგანმანათლებლო დაწესებულება/კოლეჯი.
ვიდეომეთვალყურეობის სისტემა უნდა აკმაყოფილებდეს შემდეგ ტექნიკურ მახასიათებლებს:
- ვიდეოკამერა: ქსელური (IP);
- კამერის გარჩევადობა: არანაკლებ 3 მეგაპიქსელი (2048X1536 QXGA);
- მგრძნობელობა: 0 ლუქსი აქტიური განათების შემთხვევაში (0.1 აქტიური განათების გარეშე);
- დაფარვის ზონა: შესაძლებელი უნდა იყოს შენობა-ნაგებობის მთავარი და სათადარიგო შესასვლელების 20-მეტრიანი რადიუსის ფართობის ვიზუალურად დანახვა;
- ჩანაწერის გარჩევადობა: არანაკლებ 3 მეგაპიქსელი (2048X1536 QXGA), არანაკლებ 5 კადრი წამში. დღე-ღამის რეჟიმში განხორციელებული ჩანაწერი უნდა იძლეოდეს ადამიანის (ობიექტის) ზუსტი იდენტიფიკაციის საშუალებას;
- სერტიფიკატი: აპარატურას უნდა გააჩნდეს ISO სერტიფიკატი.
